За выспятак АМАПаўцу падчас акцыі пратэсту ў Гродне 64-гадовы Юзаф Нямера быў асуджаны на 2,5 года «хатняй хіміі». Пасля другой апеляцыі пракурора яму прысудзілі паўтары гады калоніі.
Першая апеляцыя пракуратуры, у якой для падсуднага патрабавалася больш жорсткае пакаранне, абласной калегіяй суддзяў была адхілена.
У другой апеляцыі дзяржабвінаваўца настойваў на тым, што судом не ў поўнай меры быў улічаны характар супрацьпраўных дзеянняў абвінавачанага.
Аргументы Нямеры аб тым, што падчас адбыцця «хатняй хіміі» ён не здзейсніў ніякі парушэння, што ў яго на ўтрыманні 91-гадовая маці, якая не ўстае з ложка, калегія не ўлічыла.
Сам Нямера пасля прысуду практычна не мог гаварыць, у яго ад крыўды цяклі слёзы. Праваабаронца Раман Юргель сказаў пра яго.
«Гэта чалавек сумлення і паболей бы такіх. Ён не мог прайсці, калі б’юць побач жанчыну і чыняць гвалт. Вось ён сябе так і праявіў 6 верасня 2020 года».
Алесь ЗАВІНОЎСКІ