Прэс-сакратар Еўрапейскай службы знешніх дзеянняў выступіў з заявай аб рэпрэсіўных мерах у Беларусі, якія пашыраюць сферу прымянення смяротнага пакарання.
Нагадаем, у Беларусі плануюць увесці смяротнае пакаранне за «замах на здзяйсненне актаў тэрарызму».
«Гэтая папраўка да Крымінальнага кодэкса адкрывае магчымасці для далейшых сур'ёзных злоўжыванняў. Многім палітычным зняволеным (трыццаці шасці) прад'яўлены абвінавачанні ў "тэрарызме" альбо ўжо прысуджаны працяглыя тэрміны турэмнага зняволення па такіх абвінавачаннях. Шмат якія прадстаўнікі дэмакратычных сіл і палітычныя актывісты абвешчаны ў вышук па абвінавачваннях у «тэрарызме».
Многія з абвінавачаных паўстаюць перад судом на таемных, несправядлівых і прадузятых судовых працэсах, часта па сфабрыкаваных абвінавачаннях і без якіх-небудзь прававых гарантый. Цяпер ім таксама можа пагражаць смяротнае пакаранне.
Цяперашні палітычны кантэкст у Беларусі робіць гэты паварот падзей яшчэ больш трывожным», гаворыцца ў заяве.
ПР «Вясна»/юл