Еўразійскі банк развіцця ў сваім макрааглядзе 26 чэрвеня пракаментаваў чарговае зніжэнне Нацыянальным банкам Беларусі стаўкі рэфінансавання – з 9,75% да 9,50% 28 чэрвеня. І распавёў пра магчымыя рызыкі.
У ЕАБР адзначылі, што Нацбанк працягвае змякчэнне манетарнай палітыкі, што стала магчымым дзякуючы запаволенню росту цэнаў. Гэтак, гадавая інфляцыя паменшылася з 4,7% у красавіку да 3,7% у траўні. Агулам эксперты не выключаюць, што гадавая інфляцыя можа апусціцца і ніжэй за 3%. Але ёсць нюансы.
«На фоне паскарэння росту крэдытавання і ўзмацнення ўнутранага попыту будуць павялічвацца інфляцыйныя рызыкі, што запатрабуе больш кансерватыўнага падыходу да змякчэння манетарных умоваў», – заявілі ў ЕАБР.
Эксперты мяркуюць, што на канец года стаўка рэфінансавання ў Беларусі можа скласці каля 9–9,5%.
Таксама яны адзначылі паскарэнне эканамічнага росту ў краіне, што абумоўлена станоўчай дынамікай у прамысловасці і аграгаспадарцы, а таксама ў сферы гандлю. Вярнулася да росту і дынаміка інвестыцыяў.
ЕАБР прагназуе рост эканомікі Беларусі на 2,2% у канцы 2023 года.
ав/Белсат