Алесь Чайчыц: Вырак лукашэнкаўскага суда падкрэслівае каштоўнасць згаданых узнагародаў

Такім чынам сакратар інфармацыі Рады БНР пракаментараваў прызнанне «экстрэмісцкімі» сімволікі і атрыбутыкі Рады.

Радa БНР, медаль

spring96.org/скрыншот

«Гэта незаконны вырак лукашэнкаўскай судовай сістэмы, што апрача гэтага нясе адказнасць за шматлікія палітычныя прысуды, за незаконныя зняволенні людзей», – такім чынам сакратар інфармацыі Рады БНР Алесь Чайчыц пракаментараваў у эфіры «Радыё Рацыя» прызнанне экстрэмісцкімі сімволікі і атрыбутыкі Рады БНР. Адпаведнае рашэнне прыняў 12 верасня суд Цэнтральнага раёна Мінска.

Гаворка пра ордэн Жалезнага рыцара, медалі «Ордэна Пагоні», «За баявыя заслугі» і медаль да 100-годдзя БНР. Таксама «экстрэмісцкімі матэрыяламі» прызнаны лагатып (герб «Пагоня»), сайт і сацсеткі «Рады БНР», а таксама «першага намесніка старшыні «Рады БНР» Сяргея Навумчыка».

- Рада БНР будзе дамагацца таго, каб гэтыя ўзнагароды ў будучнай Беларусі зрабіць часткай сістэмы ўзнагароджанняў. Каб узнагароджаныя атрымалі адпаведныя льготы, прывілеі ад беларускай дзяржавы.

Алесь Чайчыц лічыць, што вырак лукашэнкаўскага суда падкрэслівае каштоўнасць згаданых узнагародаў.

«Ордэн Пагоні» і «Ордэн Жалезнага рыцара» – гістарычныя ўзнагароды Беларускай Народнай Рэспублікі, заснаваныя ў 1949 годзе. У 2018 годзе Рада БНР заснавала Медаль да стагоддзя БНР. У 2023 годзе заснаваны Медаль БНР за баявыя заслугі дзеля адзначэння ваяроў-беларусаў, якія праявілі адвагу ў баі.

аз