Нягледзячы на пэўную стабілізацыю сітуацыі на мяжы Польшча не адмаўляецца ад будаўніцтва сучаснай агароджы на мяжы з Беларуссю для перадухілення нелегальнай міграцыі.
Надоечы польская Памежная служба падпісала тры кантракты на будаўніцтва сучаснага плота на польска-беларускай мяжы. «Гэта важны этап у будаўніцтве памежнай агароджы», – кажа намеснік кіраўніка Міністэрства ўнутраных спраў і адміністрацыі Мацей Вонсік(Maciej Wąsik):
- Памежная служба заключыла дамовы, якія з’яўляюцца важным этапам усяго інвестыцыйнага працэса. Усе найважнейшыя рашэнні, датычныя інвестыцыі былі кансультаваныя з групай экспертаў, якія выдалі аднадушную, станоўчую ацэнку.
Намеснік кіраўніка Міністэрства ўнутраных спраў і адміністрацыі Мацей Вонсік.
Кантракты з падрадчыкамі заключыў Галоўны камендант польскай Памежнай службы. Па словах яго намесніцы брыгаднага генерала Віялеты Гажкоўскай(Wioleta Gorzkowska), будаўніцтва плота на мяжы з Беларуссю павінна працягвацца паўгода:
- Перад намі сур’ёзны выклік, паколькі гэта найбуйнейшая будаўнічая інвестыцыя ў гісторыі Памежнай службы ў Польшчы. Агулам плот будзе налічваць 186 кіламетраў і будзе падзелены на чатыры часткі з мэтай максімальнага скарачэння часу рэалізацыі інвестыцыі. Будаўнічыя работы на ўсіх чатырох участках будуць праводзіцца паралельна.
Намеснік галоўнакамандуючага Памежнай службы ў Польшчы брыгадны генерал Віялета Гажкоўска.
Віялета Гажкоўска дадае, што ў агароджы будуць зробленыя 22 вароты для пропуску людзей і для міграцыі жывёлы.
- Падчас будаўніцтва будуць выкарыстаныя амаль 41 тысяча сталёвых пралётаў. 100 пралётаў з сэрвіснымі брамкамі. Таксама будуць пабудаваныя 22 пераходы, якія павінны даць жывёле магчымасць свабоднай міграцыі. Будаўніцтва электроннай сістэмы агароджы будзе даручана іншым падрадчыкам. Зараз мы распрацоўваем умовы кантрактаў. Спадзяюся, што ў бліжэйшым часе зможам прадставіць вынікі працы па гэтаму пытанню.
Паводле Віялеты Гажкоўскай плот на мяжы з Беларуссю – неабходная і неадкладная інвестыцыя, паколькі сітуацыя на польска-беларускай мяжы надалей нестабільная:
- Таму я вельмі рада, што за настолькі кароткі час – два месяцы, нам удалося выпрацаваць адпаведныя рашэнні і заключыць кантракты на будаўніцтва «фізічнай» часткі плота.
Нагадваем, у кастрычніку 2021 года Сейм Польшчы прыняў спецыяльны закон аб будаўніцтве плота на мяжы з Беларуссю, які павінен паскорыць адміністрацыйны працэс, звязаны з рэалізацыяй інвестыцыі.
Прадстаўніца Памежнай службы нагадала, што інвестыцыя важная для аховы мяжы Польшчы:
- Гэта стратэгічная інвестыцыя ня толькі ў аспекце аховы непарушнасці польскай мяжы.
Нагадваем, Польшча са жніўня змагаецца з хваляй нелегальнай міграцыі. У 2021 годзе колькасць спрпбаў нелегальнага перасячэння мяжы з Беларусі вырасла ў 325 разоў. У мінулым годзе памежнікі зафіксавалі амаль 40 тысяч спробаў незаконнага перасячэння мяжы. У сваю чаргу колькасць затрыманых іншаземцаў вырасла амаль у дваццаць разоў.
Выкананнем сталёвых элементаў плота зоймецца кансорцыуму з трох кампаній:
- Гэта: Polimex Mostostal S.A. – лідар кансорцыуму і яго партнёры – Mostostal Siedlce i Węglokoks S.A. У сваю чаргу будаўнічыя работы былі даручаныя двум падрадчыкам: кампаніі Budimex і кансорцыуму Unibep S.A. і Budrex.
Паводле прынятага Сеймам адмысловага закона, агароджа будзе мець характар трывалага высокага плота, абсталяванага сучаснай сістэмай відэаназірання, электроннай сігналізацыі і датчыкамі выяўлення руху.
Намесніца Галоўнага каменданта польскай Памежнай службы Віялета Гажкоўска і віцэ-міністр ўнутраных спраў і адміністрацыі Мацей Вонсік, прэс-канферэнцыя.
Плот будзе складацца з 5-метровых вертыкальных слупоў, увянчаных калючым дротам і з больш за 40 тысяч сталёвых пралётаў. Даўжыня плота складзе 186 кіламетраў, а яго будаўніцтва павінна завяршыцца да ліпеня 2022 года. Агульны кошт агароджы складзе каля 1 мільярда 615 мільёнаў злотых (больш за 353 тысячу еўра).
Нагадваем, будаўніцтва плота на мяжы з Беларуссю распачала таксама Літва. Літоўская агароджа, вышынёй у 4 метры, складаецца з пірамідаў з калючага дроту – канцэрціны і плота са спіральным дротам. Цалкам агарадзіць мяжу з Беларуссю Літва плануе да 1 верасня 2022 года.
IAR/аз