Спецыяліст па ваенных пытаннях парталу Defence24.pl Юліюш Сабак заявіў, што перакідванне амерыканскіх войскаў у Польшчу і краіны Усходняй Еўропы накіравана супраць расійскай прапаганды. Адміністрацыя ЗША хоча паказаць, што для яе па-ранейшаму важныя еўрапейскія справы, а таксама расійска-ўкраінскі канфлікт.
Юліюш Сабак, які быў госцем Польскага радыё, падкрэсліў, што, адправіўшы ў Еўропу падраздзяленне дэсантнікаў, ЗША далі зразумець аб падрыхтоўцы да любога развіцця падзей у сувязі з эскалацыяй напружанасці на мяжы Расіі з Украінай.
- Гэта адна з амерыканскіх частак, якія заўсёды знаходзяцца ў боегатоўнасці. Гэта сігнал з боку ЗША: маўляў, мы высылаем сілы хуткага рэагавання, паколькі рэагуем хутка. Мы шмат размаўляем пра тых салдат, якія ўжо сюды адпраўлены, але на самой справе ў ЗША рыхтуюць наступныя звыш 10 тыс салдат, і гэта таксама ясны сігнал.
У сераду Пентагон заявіў пра павелічэнне колькасці амерыканскіх вайскоўцаў у Еўропе, каб умацаваць усходні фланг НАТО. Каля 2000 салдат будуць накіраваныя, 1700 з іх адправяцца ў Польшчу. Каля 1000 будуць перададзеныя з Германіі ў Румынію.
Каля 8500 жаўнераў былі прыведзеныя ў стан павышанай боегатоўнасці ў ЗША.
IAR PR/нг