Нямецкія СМІ прызнаюць, што ў выніку санкцый ЗША, накладзеных на кампаніі, якія будуюць газаправод Nord Stream 2, завяршэнне будаўнічых работ працягнецца да канца 2020 года.
Старшыня Еўракамісіі Урсула фон дэр Ляйен, як і нямецкі ўрад, а таксама прадстаўнікі бізнесу, раскрытыкавалі санкцыі ЗША.
У інтэрв'ю тыднёвіку „Der Spiegel” Урсула Фон дэр Ляйен прызнала, што Nord Stream 2 часткова мае палітычнае значэнне, аднак Еўрасаюз выступае супраць любых санкцый у дачыненні да еўрапейскіх кампаній, якія працуюць у адпаведнасці з законам.
Расейска-нямецкі газаправод рэзка крытыкуе Украіна, якая таксама перасцерагае Германію перад празмернай залежнасцю ад Масквы.
„Германія зараз будуе газаправод з Расіяй, але яна павінна памятаць пра тое, што гэта Расія застаецца пастаўшчыком згаданага газу”, - заявіў нямецкім СМІ кіраўнік украінскай дыпламатыі Вадзім Прыстайка. На яго думку, і Берлін, і Парыж вельмі наіўныя ў адносінах з Масквой.
Нягледзячы на крытыку з боку Украіны, Польшчы і краінаў Прыбалтыкі, Германія будуе газаправод, па якім будуць паступаць газ непасрэдна з Расіі ў Германію. Швейцарская кампанія Allseas, якая пракладaла трубаправод, пасля абвяшчэння санкцый ЗША, прыпыніла працу. Па дне Балтыйскага мора трэба яшчэ пракласці каля 160 кіламетраў труб.
аз