Прэзідэнт Анджэй Дуда сёння знаходзіцца з візітам у Бруселі, падчас якога наведае ўстановы Еўрасаюза і ў штаб-кватэру НАТА. Візіт прэзідэнта ў бельгійскую сталіцу пачаўся раніцай з сустрэчы са старшынёй Еўракамісіі Урсулай фон дэр Ляен. Затым кіраўнік Польшчы пагутарыць з кіраўніком Еўрапейскага савета Шарлем Мішэлем і генеральным сакратаром НАТА Енсам Столтэнбергам.
Сустрэча прэзідэнта са старшынёй Еўракамісіі – гэта працяг тэлефоннай размовы, якая адбылася ў апошні чацвер. Тады паведамлялася, што размова тычылася пагрозы чарговага расійскага ўмяшання ва Украіну. Сёння падчас сустрэчы, верагодна, размова пойдзе таксама пра адносіны паміж Варшавай і Бруселем і прапанову прэзідэнта ўнесці змены ў закон аб Вярхоўным судзе. Праект прадугледжвае, між іншым, ліквідацыю Дысцыплінарнай палаты. На думку прэзідэнта, гэта павінна скончыць спрэчку з Еўракамісіяй і адмарозіць Нацыянальны план рэканструкцыі.
Пасля 15:00 прэзідэнт Анджэй Дуда сустрэнецца з генеральным сакратаром НАТА, каб абмеркаваць пытанні еўрапейскай бяспекі і ўмацавання ўсходняга флангу альянсу.
Нагадваем, учора польскі прэзідэнт закончыў свой візіт у Пекін.
IAR / аз