ЕС упершыню прафінансуе закупку зброі і іншай тэхнікі для краіны, якая падвяргаецца нападу

Старшыня Еўракамісіі Урсула фон дэр Ляен заявіла аб новых санкцыях супраць Расіі і Беларусі.

Урсула фон дэр Ляен

Foto: PAP/EPA/STEPHANIE LECOCQ / POOL

Старшыня Еўракамісіі Урсула фон дэр Ляен заявіла аб далейшых санкцыях супраць Расіі пасля яе агрэсіі супраць Украіны. Паветраная прастора над Еўрасаюзам будзе зачынена для самалётаў, якія належаць Расіі, зарэгістраваныя ў Расіі або падкантрольныя Расіі. Яны не змогуць ні прызямляцца, ні ўзлятаць, ні пралятаць над тэрыторыяй супольнасці. Гэта датычыцца і прыватных самалётаў алігархаў.

Таксама будзе абмежавана дзейнасць крамлёўскіх СМІ, такіх як, Russia Today, Sputnik і іх даччыныя кампаніі. «Яны больш не змогуць распаўсюджваць сваю хлусню, апраўдваючы вайну Пуціна», – заявіла Урсула фон дэр Ляен.

Распрацоўваюцца інструменты, каб спыніць іх «таксічную і шкодную дэзынфармацыю», – дадала старшыня Еўракамісіі. Новы пакет санкцый таксама будзе накіраваны супраць рэжыму Аляксандра Лукашэнкі. Ён прызначаны для ўдару па найбольш важных беларускіх галінах.

Урсула фон дэр Ляен абвясціла, што Еўрасаюз упершыню прафінансуе закупку і дастаўку зброі і іншай тэхнікі ў краіну, якая падвяргаецца нападу.

IAR /аз