Разгортванне расійскіх войскаў у Беларусі, верагодна, з’яўляецца часткай намаганняў Расіі па ўзмацненні навучальнага патэнцыялу і правядзенні інфармацыйнай аперацыі, гаворыцца ў штодзённай справаздачы амерыканскага Інстытута вывучэння вайны (ISW), якую цытуе «Свабода».
«Спадарожнікавыя здымкі з сярэдзіны лістапада паказваюць павелічэнне расійскай тэхнікі, у тым ліку асноўных баявых танкаў, на 230-м агульнавайсковым Абуз-Лясноўскім палігоне ў Брэсце, уключаючы тэхніку сама меней на адну брыгаду. Незалежная беларуская маніторынгавая арганізацыя The Hajun Project 28 лістапада паведаміла, што расійскія войскі перакінулі 15 зенітна-ракетных комплексаў «Тор-М2« і 10 адзінак нявызначанага інжынернага абсталявання ў Брэст. Гэтыя дыслакацыі, верагодна, падтрымліваюць намаганні Расіі па навучанні, а не падрыхтоўцы да баявых дзеянняў з Беларусі... Баявыя страты сярод расійскіх інструктараў і стрэсы, звязаныя з мабілізацыяй, зменшылі навучальны патэнцыял Расіі, верагодна, павялічыўшы яе залежнасць ад беларускага навучальнага патэнцыялу», – адзначаюць у Інстытуце вывучэння вайны.
Эксперты ISW таксама дадаюць, што Крэмль, верагодна, імкнецца выкарыстоўваць разгортванне расійскіх войскаў у Беларусі як інфармацыйную аперацыю, каб зафіксаваць украінскія сілы вакол Кіева і такім чынам прадухіліць іх выкарыстанне на поўдні і ўсходзе.
Паводле звестак ISW, беларускія войскі малаверагодна заатакуюць Украіну.
аз