У Мінабароны Беларусі заявілі, што ў інцыдэнце з ракетай, якая ўчора ўпала ў Беларусі, застаюцца пытанні. Начальнік упраўлення зенітных ракетных войскаў палкоўнік Кірыл Казанцаў паведаміў, што на гэты момант разглядаюцца дзве версіі падзення ракеты, выпушчанай з тэрыторыі Украіны: «ненаўмысны пуск зенітнай кіраванай ракеты з прычыны нізкай навучанасці разліку ці няспраўнасці ракеты» альбо «наўмысная правакацыя УСУ», паведамляе «Свабода».
Нагадваем, 29 снежня каля 10. 00 у Брэсцкай вобласці ўпала ракета. У прэс-службе Лукашэнкі заявілі, што ракета прыляцела з тэрыторыі Украіны і гэтая ракета з комплексу С-300. На месцы здарэння распачалі працу Следчы камітэт, МУС, Міністэрства абароны.
Па факце здарэння з ракетай у Янаўскім раёне Мінабароны Беларусі ўчора заявіла, што ракета была разбітая сіламі войскаў супрацьпаветранай абароны Беларусі.
Украінскі бок гатовы да правядзення ва Украіне аб’ектыўнага расследавання інцыдэнту, які адбыўся 29 снежня над тэрыторыяй Беларусі ў выніку адбіцця масіраванага ракетнага ўдару Расіі, заявіла ўкраінскае Міністэрства абароны.
«Украінскі бок не выключае і свядомай правакацыі з боку дзяржавы-тэрарыста Расіі, якая праклала такі маршрут для сваіх крылатых ракет, каб справакаваць іх перахоп у паветранай прасторы над тэрыторыяй Беларусі», – падкрэслілі ў Мінабароны Украіны.
Украінскі бок таксама нагадаў, што 29 снежня Расія здзейсніла «чарговае злачынства – масіраваны ракетны абстрэл мірных гарадоў Украіны», запусціўшы прынамсі 11 дронаў і 69 крылатых ракет.
аз