Міністр ВПС ЗША Фрэнк Кендал заявіў, што пастаўка першых знішчальнікаў F-16 ва Украіну – гэта пытанне як мінімум некалькіх месяцаў. Ён не выключыў, што ЗША перададуць украінскаму боку ўласныя самалёты. Пры гэтым ён адзначыў, што F-16 наўрад ці істотна памяняюць ход вайны. Тэму працягвае карэспандэнт Польскага радыё Марэк Валкускі:
- Падчас выступу ва ўніверсітэце Джорджа Вашынгтона Фрэнк Кендал заявіў, што перад адпраўкай F-16 ва Украіну трэба вырашыць шмат пытанняў, што зойме ў лепшым выпадку некалькі месяцаў.
На пытанне, ці могуць ЗША ахвяраваць уласныя самалёты, ён адказаў, што ёсць шмат магчымасцей. «F-16 дапамогуць украінцам, але кардынальна сітуацыі не памяняюць», – ацаніў Фрэнк Кендал. Ён растлумачыў, што ваенна-паветраныя сілы не з'яўляюцца вырашальным фактарам у вайне ва Украіне, таму што ні адзін з бакоў не дамінуе ў паветры. Адказваючы на пытанне, чаму рашэнне аб перадачы знішчальнікаў F-16 не было прынята раней, прадстаўнік Пентагона сказаў, што ёсць больш важныя прыярытэты, звязаныя з контрнаступленнем, якое рыхтуе Украіна.
IAR/аз