Міністэрства юстыцыі Польшчы плануе ўвесці правіла, якое прадугледжвае крымінальную адказнасць за дэманстрацыю забароненай сімволікі, паведамляе Rzeczpospolita. Тры гады будзе пагражаць за захоўванне, валоданне ці дэманстрацыю прадметаў з выявай нацысцкай, камуністычнай, фашысцкай ці таталітарнай сімволікі. Новае правіла, хутчэй за ўсё з'яўляецца наступствам сюжэта, які паказалі на прыватнай тэлестанцыі TVN пра святкаванне дня нараджэння Гітлера. У 2009 годзе падобную адказнасць увяла кіроўная тады Грамадзянская платформа. Тады зʼявіліся каментары, што ў турму патрапяць людзі, якія апранаюць майкі з выявай сярпа і молата, надпісам СССР ці ГДР, ці з выявай кубінскага рэвалюцыянера Чэ Гевары. У 2009 годзе такая вопратка была шырокадаступнай у крамах.
Прапанова цяперашняга міністра юстыцыі Збігнева Зёбры адрозніваецца ад ранейшай тэрмінам зняволення: не два а тры гады турмы. Акрамя гэтага, міністэрства тлумачыць, што карацца будзе не само выкарыстанне прадметаў з сімволікай, а дэманстрацыя іх з мэтай прапаганды палітычнага ладу або ідэалогіі. Такім чынам выключаецца крымінальная адказнасць людзей, якія апранулі майку, не ведаючы, што на ёй выяўлена.
Выява Чэ Гевары сёння – больш сімвал поп-культуры, чым носьбіт нейкай ідэі. Каб пакараць чалавека апранутага, напрыклад, у такую ж майку, трэба будзе даказаць, што ён ведае гісторыю Лацінскай Амерыкі ХХ стагоддзя і мэтанакіравана надзеў гэтую майку, – піша Rzeczpospolita.
яс