Часовы павераны ЗША ў Беларусі сустрэўся з сем’ямі палітвязняў

Праваабаронцы прызналі палітычнымі зняволенымі 887 чалавек. 

Сем'і палітвязняў на сустрэчы з амерыканскімі дыпламатамі

Крыніца: twitter.com/USEmbBy/

Часовы павераны ў справах ЗША ў Беларусі Рубэн Аруцюнян сустрэўся з сем’ямі палітычных вязняў з нагоды Дня падзякі, паведаміла амбасада ў Twitter.

Праваабаронцы «Вясны» адзначаюць, што сярод тых, хто быў на сустрэчы, жонкі палітычных зняволеных вясноўцаў Алеся Бяляцкага і Уладзя Лабковіча, бацькі Мікалая Дзядка і Марыі Калеснікавай, маці Анастасіі Булыбенкі, жонкі Ігара Лосіка, Мікалая Статкевіча, Максіма Знака і іншыя.

Часовы павераны Аруцюнян меў гонар вітаць у гасцях сем'і палітычных вязняў з нагоды Дня падзякі каб выказваць нязменную падтрымку зняволеным і іх сем'ям. ЗША заклікаюць безумоўна вызваліць усіх палітычных зняволеных у Беларусі. pic.twitter.com/IdgTjW3IA4

— U.S. Embassy Minsk (@USEmbBy) November 27, 2021

На момант публікацыі праваабаронцы прызналі палітычнымі зняволенымі 887 чалавек. На самой справе, зняволеных з палітычных прычынаў значна больш, ды праваабаронцы правяраюць кожную справу на адпаведнасць міжнародна прызнанаму азначэнню «палітвязень» і часам проста не паспяваюць за рэпрэсіўным апаратам.

Афіцыйны Мінск у жніўні адклікаў згоду на прызначэнне Джулі Фішэр амбасадаркаю ЗША. Штаты ў Беларусі цяпер прадстаўляе часовы павераны.

belsat.eu/эж