У Кіеве, Вільні ці Варшаве дзейнасць людзей, якія выехалі з палітычных прычынаў, спрабуюць адсочваць, пра гэта заяўляе ініцыятыва BYPOL у новым расследаванні.
«Цалкам расслабляцца не варта, так як наведваюць дадзеныя мерапрыемствы і іх агенты нашай краіны. Адным з такіх пасажыраў аказаўся ўладальнік зялёнага дыпламатычнага пашпарту палкоўнік Аляксей Дудыкін. У Варшаве Дудыкіна ўжо чакаў ягоны калега – Дзмітрый Дунай», – гаворыцца ў матэрыяле.
Што рабілі ў Польшчы агенты Лукашэнкі? ByPol гэтага не тлумачыць, бо за дакументаванне іх дзейнасці адказвае польская контрразведка.
Гэта вайскоўцы дзявятага аддзелу Галоўнага разведвальнага ўпраўлення генштабу Узброеных Сілаў Рэспублікі Беларусь, які выкарыстоўваецца акурат для збору інфармацыі і сачэння за апазіцыйнымі актывістамі і палітычнымі лідарамі за мяжою. І для іх магчымай ліквідацыі.
Дунай вярнуўся ў Беларусь 21 студзеня 2021 года аўтобусам, а Дудыкін прыляцеў у Мінск самалётам на наступны дзень. Пасля абодва былі зняты з выведкі і пераведзены ў Сілы спецыяльных аперацый беларускай арміі. Як піша ByPol, агентаў вярнулі ў Беларусь у сувязі з тым, што яны прысвоілі грошы, якія зэканомілі падчас місіі ў Польшчы.
У размове з журналістамі канала "Белсат" прэс-сакратар спецслужбаў Польшчы Станіслаў Жарын не пацвердзіў, але і не абверг фактаў, што ў краіне вядзецца праца па выяўленні агентуры Аляксандра Лукашэнкі. А таксама па недапушчэнні правакацыяў падчас публічных беларускіх акцыяў.
Прадстаўнікі BYPOL таксама звяртаюць увагу, што людзі, якія непрыхавана назіраюць за акцыямі пратэстаў за мяжой, часта аказваюцца прадстаўнікамі мясцовых спецслужбаў.
Паводле «Белсат» / вх