27 студзеня на тэрыторыі былога нямецкага канцэнтрацыйнага лагера Аўшвіц-Біркенаў у Асвенціме пройдуць урачыстасці з нагоды 75-ай гадавіны вызвалення канцлагера.
Удзел ва ўрачыстасцях пацвердзіла 51 дэлегацыя – як урадавыя, так і прадстаўнікі міжнародных арганізацыяў.
Па словах віцэ-старшыні польскага Інстытуту нацыянальнай памяці Матэвуша Шпытмы, Польшча мае поўнае права быць аўтарам памяці пра злачынствы супраць чалавецтва, якія адбываліся на працягу вайны, у тым ліку ў Аўшвіц. Госць Польскага радыё нагадаў, што палова ахвяраў Галакосту былі грамадзянамі Польшчы.
- Мы павінны змагацца за памяць пра тых, хто быў забіты немцамі і супрацьдзейнічаць таму, каб іх смерць, іх пакутніцтва нехта выкарыстоўваў дзеля ўласных палітычных інтарэсаў.
27 студзеня 1945 года салдаты Першага ўкраінскага фронту адчынілі брамы канцлагера Аўшвіц-Біркенаў. Вызвалення дачакалася каля 7 тыс. вязняў.
Урачыстасці з нагоды гадавіны падзеі адбудуцца таксама ў Ізраілі. Прэзідэнт Анджэй Дуда не прыняў запрашэння на ўдзел у форуме, паколькі гаспадары не прадбачылі выступлення польскага прэзідэнта, затое будзе прамаўляць прэзідэнт Расіі Уладзімір Пуцін.
ІАР ПР/нг
на здымку - галоўны ўваход у канцлагер