Прэмʼер-міністр Новай Зеландыі Джасінда Ардэрн абвясціла ў нядзелю, што з-за новых санітарна-эпідэмічных абмежаванняў, прынятых яе ўрадам, яна была вымушаная адтэрмінаваць сваё вяселле. Дата цырымоніі пакуль не вызначаная, але, як паведамляе агенцтва AFP, грамадзяне Новай Зеландыі чакалі, што прэмʼер выйдзе замуж у бліжэйшыя тыдні.
«Майго вяселля цяпер не будзе», – сказала Джасінда Ардэрн, маючы на ўвазе новыя абмежаванні, у тым ліку ўвядзенне абмежавання на колькасць удзельнікаў імпрэзаў да 100 чалавек.
«Я толькі што далучылася да многіх іншых новазеландцаў, якія мелі падобны вопыт з-за пандэміі, і прашу прабачэння перад усімі, хто сутыкнуўся з такім сцэнарыем», – дадала яна.
Новыя абмежаванні ў Новай Зеландыі дзейнічаюць ад нядзелі, а іх увядзенне было звязана з выяўленнем дзевяці выпадкаў заражэння амікрон-штамам у адной сямʼі. Сямʼя ездзіла паміж некалькімі гарадамі, а каранавірусныя інфекцыі былі выяўленыя таксама ў экіпажу самалёта, на якім яна лётала. Абмежаванні павінны дзейнічаць як мінімум да канца наступнага месяца.
У Новай Зеландыі да гэтага часу зарэгістравана 15 104 выпадкі каранавіруснай інфекцыі і 52 выпадкі смерці асобаў, заражаных каранавірусам.
PAP/аз