Старшыня Еўрапейскай рады Шарль Мішэль 9 траўня прыехаў адзначыць Дзень Еўропы ў Адэсу, як ён выказаўся, «горад, дзе, па словах Пушкіна, адчуваецца Еўропа. І дзе сёння ўкраінцы абараняюць свае помнікі ад куль і ракет, абараняюць сваю свабоду ад расійскай агрэсіі. Вы не самотныя. Еўрапейскі Звязу з вамі».
Мішэль быў вымушаны перапыніць сустрэчу з прэм'ер-міністрам Украіны Дзянісам Шмыгаем у сувязі з ракетнымі абстрэламі Адэсы. Таксама адбылася сустрэча Мішэля і мэра Адэсы Генадзя Труханава. Прэзідэнт Украіны Уладзімір Зяленскі падчас анлайн-размовы з Шарлем Мішэлем адзначыў, што шануе смелую пазіцыю старшыні Еўрапейскай рады за яго наведванне Адэсы, якая знаходзіцца пад пастаянным расійскім абстрэлам.
Візіт аднаго з кіраўнікоў ЕЗ адбыўся на фоне папярэджванняў Міністэрства абароны Украіны пра пагрозу далейшага выкарыстання Расіяй крылатых ракет з акваторыі Чорнага мора па ваенных і грамадзянскіх абʼектах. У акваторыі Чорнага мора знаходзяцца сем баявых караблёў РФ з крылатымі ракетамі «Калібр». Караблі прыведзены ў баявую гатовасць.
iar/эж