Прэзідэнт Украіны Уладзімір Зяленскі заявіў, што ўсе гарады, часова акупаваныя расіянамі, вернуцца пад кантроль Кіева. У сваім вячэрнім выступе ён таксама нагадаў пра Дзень памяці ахвяр дэпартацыі крымскіх татараў, які адзначаўся 18 мая. Палітык заявіў, што Украіна ніколі не кіне свой народ і будзе змагацца за тое, што ёй належыць паводле права.
- Херсон, Мелітопаль, Бярдзянск, Энергадар, Марыупаль і ўсе нашы гарады і населеныя пункты, якія знаходзяцца пад акупацыяй — часовай акупацыяй, — павінны ведаць, што Украіна вернецца. Наша дзяржава нікога не кідае і забірае тое, што ёй належыць паводле права.
Уладзімір Зяленскі падпісаў указ аб падаўжэнні ваеннага становішча ў краіне і ўсеагульнай мабілізацыі. Ён выказаў надзею, што Вярхоўная Рада Украіны ў бліжэйшы час зацвердзіць гэтыя дакументы. «Наша армія і ўсе, хто абараняе дзяржаву, павінны мець усе юрыдычныя інструменты, каб дзейнічаць», — дадаў украінскі лідар.
IAR PR/нг