З панядзелка, 19 верасня, Польшча і краіны Балтыі абмяжоўваюць уезд грамадзян Расіі з шэнгенскімі візамі. Абмежаванні звязаныя з вайной ва Украіне. «Вас тут ніхто не хоча», – напісаў на мінулым тыдні кіраўнік латвійскай дыпламатыі.
Абмежаванні распаўсюджваюцца на ўезд для грамадзян Расіі, якія маюць кароткатэрміновыя шэнгенскія візы, выдадзеныя для турызму і адпачынку. Ёсць і выключэнні, дзякуючы якім абмежаванні не распаўсюджваюцца, у тым ліку на: візіты з гуманітарнымі мэтамі і ўезд асоб, якія пераследуюцца па палітычных матывах.
У пятніцу прэм'ер-міністр Матэвуш Маравецкі заявіў у Вільні, што Польшча і краіны Балтыі заклікаюць іншыя краіны ЕС увесці падобныя абмежаванні.
Міністэрства замежных спраў Латвіі ў заяве падкрэсліла, што свабодныя паездкі расіян з мэтай турызму ў краіны Еўрасаюза ў той час, калі расійскія войскі атакуюць Украіну, зʼяўляюцца не толькі немаральнымі, але пагражаюць бяспецы і грамадскаму парадку. На думку міністэрства, гэта можа быць звязана як з палітычнымі правакацыямі, так і з агрэсіяй у публічнай прасторы.
IAR/аз