Расія знаходзіцца на мяжы грамадзянскай вайны, якую можа справакаваць толькі невялікая ўнутраная сварка, заявіў кіраўнік вайсковай выведкі Украіны (ГУР) генерал Кірыла Буданаў у інтэрв'ю, апублікаваным ў чацьвер брытанскай штодзёнцы The Times.
Ён растлумачыў, што гэтая ацэнка заснавана на аналізе ГУР сакрэтнага ўнутранага даследавання МУС Расіі аб грамадскай падтрымцы падчас паўстання групы Вагнера. Ён растлумачыў, што МУС Расіі выкарыстоўвае шпіёнскую тэхналогію новага пакалення, якая дазваляе адсочваць асобныя дадаткі для зносін у Інтэрнэце, тэндэнцыі ў сацыяльных сетках і настроі ў Інтэрнэце. У вырашальныя дні паўстання, 24 і 25 чэрвеня, расійскае міністэрства падлічыла, што Яўген Прыгожын, кіраўнік ПВК «Вагнер», меў большую падтрымку насельніцтва ў 17 з 46 раёнаў Расіі, прэзідэнт Уладзімір Пуцін – у 21, і аналагічную падтрымку для абодвух у астатніх.
«Гэта тое, што мы цяпер бачым: расійскае грамадства разарванае напалам. Сітуацыя паказвае менавіта тое, што казалі нашы службы: што Расійская Федэрацыя стаіць на парозе грамадзянскай вайны. Маленькi ўнутраны «скандал» і разгарыцца ўнутраны канфлікт», – сказаў Буданаў.
Аналіз ГУР даследавання Міністэрства ўнутраных спраў Расіі паказвае, што падчас паўстання Пуцін мог разлічваць на лаяльнасць Масквы, але не Санкт-Пецярбурга, свайго роднага горада; а таксама тое, што сярод рэспублік РФ найменшая падтрымка Пуціна была ў Дагестане, дзе Прыгожына падтрымалі 97 працэнтаў насельніцтва.
На пытанне, ці можа падзенне Пуціна пасля поўнага разгрому Расіі справакаваць яшчэ большую нестабільнасць і, як вынік, яшчэ горшыя наступствы для Украіны, Буданаў адказаў, што падзенне прэзідэнта Расіі можа быць толькі на карысць яго краіне.
Ён дадаў, што мэта Украіны ў вайне зразумелая – аднавіць суверэнітэт над усёй сваёй тэрыторыяй, – а мэта Расіі незразумелая і ўжо вядома, што яна не будзе дасягнутая. «Якая мэта Расіі? Ніхто не можа сказаць, чаго яна хоча. Яны кажуць, што хочуць, каб Украіна была «не антырасійскай». Нягледзячы на гэта, яны ўсё робяць насуперак», – звярнуў увагу Буданаў.
Кіраўнік вайсковай выведкі Украіны таксама сказаў, што рызыка наўмыснага пашкоджання Расіяй Запарожскай АЭС, пра што ён сам папярэджваў два тыдні таму, з тых часоў знізілася, хоць ён не стаў раскрываць, на чым грунтуецца такая ацэнка.
З Лондана Bartłomiej Niedziński (PAP)/яс