Эманюэль Макрон асудзіў расійскія зверствы ў Ізюме

«Я рашуча асуджаю зверствы, учыненыя ў Ізюме пад расійскай акупацыяй», – напісаў прэзідэнт Францыі.

Прэзідэнт Францыі Эманюэль Макрон

PAP/EPA/LUDOVIC MARIN / POOL

Прэзідэнт Францыі Эманюэль Макрон асудзіў расійскія зверствы ў вызваленым Ізюме Харкаўскай вобласці. Украінцы выявілі там брацкія магілы, у якіх пахавана як мінімум 450 цел са слядамі гвалту і катаванняў. Улады Францыі абвясцілі, што вінаватых чакае суд. Тэму працягвае карэспандэнт Польскага радыё Стэфан Фольцэр:

- Пра жудасныя знаходкі пад Ізюмам прэзідэнт Францыі згадаў у сацсетках. «Я рашуча асуджаю зверствы, учыненыя ў Ізюме пад расійскай акупацыяй», – напісаў кіраўнік дзяржавы. «Злачынцам давядзецца адказаць за свае дзеянні. Няма міру без справядлівасці», – сказаў Эманюэль Макрон. Абурэнне выказала і кіраўнік МЗС Францыі Катрын Каляна. «Гэтага занадта», – адказала кіраўнічка французскай дыпламатыі. «Ваенныя злачынствы – гэта ваенныя злачынствы. Злачынцы будуць прыцягнуты да адказнасці», – напісала Каляна ў сацсетках. Амбасадар Францыі ў Кіеве заявіў, што ў Ізюме выяўленыя «абсалютна шакуючыя» сляды расійскіх ваенных злачынстваў. Дыпламат выказаў салідарнасць з украінскімі ўладамі.

IAR/аз