Украінскія войскі працягвалі наступаць у Данецкай вобласці, яны прарвалі расійскія абаронныя пазіцыі на паўночным усходзе Херсонскай вобласці. Перамогі ЗСУ негатыўна ўплываюць на расійскую інфармацыйную прастору.
Пра гэта гаворыцца ў справаздачы амерыканскага Інстытуту па вывучэнні вайны.
Паражэнне Расіі ў Харкаўскай вобласці і Лімане ў спалучэнні з няздольнасцю Крамля эфектыўна і справядліва правесці частковую мабілізацыю карэнным чынам змяняюць расійскую інфармацыйную прастору. Крамлёўскія СМІ і расійскія вайсковыя блогеры з-за страты Лімана пачалі крытыкаваць бюракратычныя правалы частковай мабілізацыі.
«Крыніцы ў Крамлі і вайсковыя блогеры тлумачаць паразу вакол Лімана і Харкаўскай вобласці няздольнасцю расійскіх вайскоўцаў належным чынам забяспечыць і ўзмацніць расійскія сілы на поўначы Данбаса і скардзяцца на адсутнасць празрыстасці падчас вайны. Некаторыя госці моцна рэдагуемых праграм крамлёўскага тэлебачання, якія выйшлі ў эфір 1 кастрычніка, нават крытыкавалі рашэнне расійскага прэзідэнта Уладзіміра Пуціна анексаваць 4 украінскіх вобласці перад тым, як абараніць іх адміністрацыйныя межы ці нават лінію фронту, выказваючы сумневы ў здольнасці Расіі калі-небудзь акупаваць гэтыя тэрыторыі цалкам», – гаворыцца ў справаздачы Інстытуту.
Адзначаецца, што расійскія прапагандысты ўжо не хаваюць свайго расчаравання мабілізацыйным працэсам у РФ, у прыватнасці, зважаюць на тое, што ў шэрагі арміі часта трапляюць алказалежныя.
Некаторыя, выступаючы ў прамым эфіры па тэлебачанні, выказалі занепакоенасць тым, што мабілізацыя не створыць сілы, неабходныя для аднаўлення ініцыятывы на полі бою, улічваючы нізкую якасць расійскіх рэзерваў.
Хартыя'97/нг