Ленінскі суд Гродна асудзіў Сяргея Рымшу на тры з паловай гады пазбаўлення волі ў калоніі агульнага рэжыму.
Яго звінавацілі ў тым, што нібыта 9 жніўня ў цэнтры Гродна ён кінуў камень у аўтобус з АМАПам. Яго абвінавацілі адразу па двух артыкулах Крымінальнага кодэксу.
Пацярпелымі выступалі шэсць супрацоўнікаў міліцыі. Справа Рымшы расцягнулася па часе, яна разглядалася з лістапада мінулага году.
22 студзеня ў Слонімскім раённым судзе абвешчаны прысуд Кацярыне Салевіч, маці малалетняга дзіцяці. Суд палічыў, што яна наўмысна публічна абразіла прадстаўніка ўлады ў тэлеграм-канале.
Пацярпелым прызнаны міліцыянт АМАП, фатаграфію і асабістую інфармацыю якога яна рэпостнула. Паводле матэрыялаў следства, пад рэпостам дзяўчына размясціла паведамленне «з тэкстам абразлівага зместу, якія прыніжае гонар і годнасць міліцыянера».
Салевіч прысудзілі год «хатняя хімія» і абавязалі выплаціць «пацярпеламу» 1000 рублёў маральнай кампенсацыі.
Алесь ЗАВІНОЎСКІ