Двое актывістаў міжнароднай экалагічнай арганізацыі Greenpeace былі затрыманыя пасля начной аперацыі Памежнай варты ў гданьскім порце. Гэта грамадзянін Іспаніі капітан парусніка Rainbow Warrior, а таксама адна з актывістак арганізацыі грамадзянка Аўстрыі, якая плыла на пантоне.
Астатнія 20 чалавек былі адпушчаны пасля допыту. Уначы актывісты Greenpeace, выкарыстоўваючы тры пантоны, падплылі да карабля з вугалем з Мазамбіка й намалявалі на ім надпіс: „ Стоп вугалю”.
Тадэвуш Грухальля (Tadeusz Gruchalla) з Памежнай варты паясняе, што функцыянеры правялі аперацыю ў сувязі з парушэннем законаў.
- У сувязі з тым, што паруснік Greenpeace не рэагаваў на заклікі Памежная варта была прымушаная ўмяшацца. Функцыянеры высветлілі асобы ўсіх, якія знаходзіліся на борце карабля і паяснілі, хто, якую ролю адыграў падчас парушэння правілаў. Нагадаю, гаворка ідзе пра парушэнне правілаў бяспекі суднаходства і парушэнне правілаў, датычных Памежнай варты.
Тым часам прэс-сакратар Greenpeace Polska Марэк Юзэфяк (Marek Józefiak) называе рэакцыю памежнікаў неадэкватнай. Паводле арганізацыі, акцыя пратэсту мела мірных характар і павінна была звярнуць увагу польскага ўрада на неабходнасць аховы клімату шляхам адрачэння эканомікі ад вугалю.
Пра лёс затрыманых дзеячаў экалагічнай арганізацыі вырашыць пракуратура. Парусны карабель, на якім прыплылі актывісты, быў адбуксаваны.
аз