Гэты заклік быў зроблены ў лісце, накіраваным старшыне Еўрапейскай рады Шарлю Мішэлю напярэдадні відэасаміта Еўрапейскага Звязу, прысвечанаму пандэміі. Сустрэча адбудзецца напрыканцы гэтага тыдня.
«Своечасовы доступ Еўропы да дастатковай колькасці вакцын застаецца нявырашанай праблемай», – напісалі ў сумесным звароце прэмʼеры Польшчы, Іспаніі, Даніі, Бельгіі і прэзідэнт Літвы.
«Нягледзячы на беспрэцэдэнтна хуткую распрацоўку новых высакаякасных вакцын, вытворчыя цяжкасці працягваюцца і прыводзяць да сурʼёзных затрымак. У спалучэнні са зʼяўленнем новых варыянтаў COVID гэта рызыкуе паставіць пад пагрозу наш шлях да поўнага аднаўлення і нармальнага жыцця».
Еўрапейскі Звяз заключыў дамовы на пакупку вакцынаў з наступнымі кампаніямі: Pfizer-BioNTech, AstraZeneca, Moderna, CureVac, Sanofi-GSK і Johnson & Johnson. Паводле дадзеных урада, у Польшчы супраць каранавіруса былі прышчэплены каля 2 млн 760 тысяч чалавек.
pap/эж