Пётр Цвік з Канцылярыі прэзідэнта Польшчы заявіў, што на бліжэйшым саміце NATO будуць абмяркоўвацца, між іншым, пытанні вайсковай прысутнасці ЗША ў Еўропе. Таксама будуць абмяркоўвацца пытанні бяспекі ўсходняга фланга Альянсу, і сітуацыя ў Беларусі ды Расіі.
Польскі саноўнік падкрэсліў, што падчас саміту прэзідэнт Анджэй Дуда плануе паразмаўляць з прэзідэнтам ЗША па пытаннях, звязаных з інтарэсамі Польшчы.
- Спадар прэзідэнт едзе на саміт з канкрэтнымі пастулатамі, якія ён агучыць ад імя Польшчы. Трэба памятаць, што мы агучым наша крытычнае стаўленне ў справе трубаправоду Nord Stream 2. Наш прэзідэнт гатовы да таго, каб прадставіць нашу пазіцыю, калі прэзідэнт Байдэн захоча выслухаць меркаванне Польшчы.
Саміт НАТА з удзелам кіраўнікоў дзяржаў-чальцоў пройдзе ў Бруселі 14 чэрвеня. Як раней паведамляў генеральны сакратар NATO Енс Столтэнберг, галоўнымі тэмамі саміта будзе палітыка Расіі, пагроза тэрарызму, кібератакі, новыя тэхналогіі, уплыў змен клімату на бяспеку ды адносіны з Кітаем.
ПР/юл