Начальнік Галоўнага ўпраўлення разведкі Мінабароны Украіны генерал Кірыла Буданаў заявіў, што сярод 215 вызваленых з расійскага палону ўкраінскіх жаўнераў ёсць таксама абаронцы завода «Азоўсталь» і іх камандзіры:
- Усяго вярнуліся 215 чалавек, у тым ліку двое мірных жыхароў і 8 чалавек, пацярпелых у выніку тэракта ў Аленаўцы, пра які мы паведамлялі. Таксама былі адпушчаныя 10 замежнікаў – вайскоўцаў Інтэрнацыянальнага легіёну.
У сваю чаргу Украіна адпусціла 55 расіянаў і калабарантаў, а таксама арыштаванага праз падазрэнне ў дзяржаўнай здрадзе Віктара Медзведчука, лідара забароненай ва Украіне партыі «Апазіцыйная платформа «За жыццё«» і кума расійскага прэзідэнта Уладзіміра Пуціна.
Гэта быў найбуйнейшы абмен палоннымі падчас расійскай вайны. Ён праходзіў адначасова на тэрыторыі чатырох краін – ва Украіне (на ўкраінска-расійскай мяжы), а таксама на тэрыторыі Польшчы, Турцыі і Саудаўскай Аравіі. Пяцёра вызваленых з палону камандуючых абаронай завода «Азоўсталь» да канца вайны застануцца пад аховай прэзідэнта Турцыі.
IAR/аз